उत्तर भारत अन्दर इक परदेस है जिसेरा नां हिमाचल प्रदेस है। हिमाचल प्रदेस अन्दर बाराह् जिले हिन। ए सब जिले बड़े भरी छैळ हिन ते एह् हरे-भरे हिन। चम्बा जे है, से हिमाचल प्रदेस रे इन्हा बाराह् जिलेयाँ बिच का इक जिला है। एह् जघा जे है, से भारत रे बड्ड़े सैहरां सांह्ई बड़ी बड्डी नी है (दिल्ली, मुम्बई)। चम्बा इक पहाड़ी इलाका है। जिस बेल्ले 2001 अन्दर जनगणना होई थी ता, चम्बे अन्दर 20,312 मणू थिय्ये। चम्बे अन्दर इक दरिया बी है जिसेरा नां "रावी" है।
असी, जेड़े जे इस वैबसाईट अन्दर कम्म करेया करदे हिन, एह् चान्दे कि चम्बयाळी भासा री खासियत सबनी जणेयाँ जो पता लग्गो। असी चम्बे रे लोकां जो तिन्हेरी अपणी भासा अन्दर नेक-बनेकी चीज्जां उपलब्ध कराणा चाह्न्दे। अगर कोई अपणी भासा अन्दर इनटरनैट पर पढ़ो, सुणो, दिक्खो या किच्छ ड़ाउनलोड़ करो ता इय्याँ करणे अन्दर बड़ा मजा इन्दा। अपणी भासा अन्दर बणेरे गाणे सुनणा, विड़िओ दिख्खणा, काह्णियाँ पढ़णा, एह् सब बड़ा छैळ लगदा। इधेरे तांई असां ने एह् सोच्चेया, कि इक इदेह्ई वैबसाईट बणाई जाओ जिस बिच जे किच्छ बी हो, से चम्बे री लोकल भासा अन्दर ई हो।
हमारी इस वैबसाईट बनाणे री खास वजाह् एह् है कि, चम्बे रे लोक, चम्बे री भासा जो भुल्ली ना जान ते नां ई इस भासा जो कोई छोटी-मोटी भासा समझन। कोजोकी, हर इक भासा री अपणी ई इक "टोह्र" हुन्दी। चम्बे री भासा री “टोह्र” बी बखरी ई है जी।
तुसी अपणी सलाह् भेजणे ताँई असांजो ई-मेल बी करी सकदे, arunnw@gmail.com
एह् वाळी वैबसाईट खोलणे ताँई तुम्हारी बड़ी मैह्रबानी।
